Gabriel Aresti: Nietszche Baino Jesus Hobetsi Zuen Sinesgabeko Kristozalea

Argumento de Gabriel Aresti: Nietszche Baino Jesus Hobetsi Zuen Sinesgabeko Kristozalea

Gabriel Aresti izan da, seguruenik, euskal literatur idazleetan, Bibliaren eskemaz eta erreferentziez gehien baliatu den autorea baita, aldi berean, espainiar nazional katolizismoaz kutsaturiko eliza katolikoaren kontra gogor eta sarrien aritu denetarikoa ere. Bestalde, Aresti dugu bere buruarentzat Nazareteko Jesusekin antzekotasuna esplizitu eta sutsuen errebindikatu duen euskal idazlea: “Kristo buruz behera gruzifikatua: Ene mundua ez da erreinu honetakoa”. Bibliarik eta, batez ere, Ebanjeliorik gabe, ezin daitezke interpreta ez Maldan behera, ez Harri eta Herri, Euskal Harria, Harrizko Herri Hau olerki liburuak, ezta Arestiren antzerki, eleberri eta ipuinik gehienak ere. Lan honetan, GA erlijio eta, batez ere, kristautasun ikuspuntutik aztertzen saiatu naiz. Aresti Kristozalea zen eta, behin baino gehiagotan, Kristoren pertsonifikazioa aldarrikatu zuen bere buruarentzat: “Ni naiz Kristo urdina”. Kristautasunik gabe ez dago ulertzerik ez Aresti literatoa, ez Aresti pertsona ere. Haatik eta hala, GAk sinesgabetzat jo zuen bere burua, nahiz, azken buruan, Jainkoaren heriotza (erailketa) aldarrikaru zuen Friedrich Nietzsche baino pobreen aldeko konpromisoa bereganatu zuen Nazareteko Jesus hobetsi zuen. Pertsona mailan GA Kristozalea izan bazen: “Maitatzen dut Jesukristo / bihotzetikan”... “ Jesukristorik gabetan ezta / Ebanjeliotikan. / Hura gabe elizek eztute / baliorikan”, gizarte mailan, gutxi-asko, kristau soziologikoa izan zen, noizbehinkakoa baino ohikoagoa omen: “Galileako lurrean, / bizitzen ginen denok. / Andreak eta gizonak, / neskatxak eta mutilak”; ez hainbeste, haatik, kristau ofiziala edota eliza katolikoko kristau ‘fidela’. Zer egin horrelako pertsona baten erlijio edo kristautasunaren lekukotzarekin? Ikerketa honetan, bi ahalbide eskaintzen zaizkigu: biografiarena eta literatura ekoizpenarena. Biak hartuko ditut kontuan. Biografiarena lehenik eta literaturarena gero. Biografiarenak humus edota kontestua emango digu eta literaturarenak GAren erlijio esperientzia zelan bilakatu zen azalduko digu. Has gaitezen biografiarekin.0